චීනයේ ග්වැන්ඩොං-හොංකොං-මැකාඕ මහා බොක්ක ප්‍රදේශයේ විදේශ වෙළඳාම පිළිබඳ දත්ත නිකුත් කිරීමට සූදානම්

චීනයේ ග්වැන්ඩොං-හොංකොං-මැකාඕ මහා බොක්ක ප්‍රදේශය (GBA) ආශ්‍රිත සංවර්ධන කටයුතු තවදුරටත් ඉදිරියට ගෙන යාමේ පුළුල් ප්‍රයත්නයන්හි කොටසක් ලෙස, එම ප්‍රදේශය සඳහා වන භාණ්ඩවල විදේශ වෙළඳාම පිළිබඳ දත්ත නිකුත් කිරීමට පියවර ගනු ඇති බව චීනයේ රේගු සාමාන්‍ය පරිපාලනය පවසයි.

ග්වැන්ඩොං හි ආර්ථික කේන්ද්‍රස්ථාන වන Guangzhou, Shenzhen සහ Zhuhai ඇතුළු මෙම ප්‍රදේශයේ ප්‍රධාන නගර නවයක් සමඟ හොංකොං සහ මැකාඕ විශේෂ පරිපාලන කලාප එක් කරමින් ගෝලීය මට්ටමේ නගර පොකුරක් වන GBA හි සංවර්ධනයට සහාය වීම සඳහා චීනයේ රේගු සාමාන්‍ය පරිපාලනය විසින් මෑතකදී එළිදක්වන ලද පියවර 20කින් යුත් පැකේජයකට මෙම පියවර ද ඇතුළත් වේ.

වර්තමානයේ, මෙම කලාපයේ ප්‍රධාන නගර වන හොංකොං සහ මැකාඕ සඳහා වන වෙළඳ දත්ත විවිධ සංඛ්‍යාලේඛන පද්ධති යටතේ වෙන් වෙන් වශයෙන් සම්පාදනය කර තිබීම‍ හේතුවෙන් කලාපය සඳහා සෘජුව සමස්ත දත්ත ලබා ගැනීම අභියෝගයක් වී ඇත.

එබැවින් චීන මහ ගොඩබිමේ ප්‍රධාන රේගු බලධාරීන් හොංකොං සහ මැකාවෝ හි සිය නියෝජිතයින් හා එක්ව GBA කලාපය සඳහා භාණ්ඩ වෙළඳාම පිළිබඳ සමස්ත දත්ත අධ්‍යයනය කර නියමිත වේලාවට නිකුත් කරනු ඇතැයි රේගු සාමාන්‍ය පරිපාලනයේ නිලධාරියෙකු වන Lin Shaobin මහතා පැවසීය.

මෙම දත්ත අදාළ කලාපයේ වෙළඳ ප්‍රවණතා සහ එහි ව්‍යුහය පිළිබඳ වඩාත් නිවැරදි විශ්ලේෂණයකට සහාය වන අතරම, මහජනතාවට එහි ආර්ථික ක්‍රියාකාරිත්වය පිළිබඳ පූර්ණ විග්‍රහයක් ලබා දෙනු ඇති බවත් හෙතෙම සඳහන් කළේය.

චීනයේ වඩාත්ම විවෘත හා ජවසම්පන්න ආර්ථික මධ්‍යස්ථානයක් වන GBA කලාපය, රට තුළ විදේශ වෙළඳාමේ ශක්තිමත් ඔරොත්තු දීමේ හැකියාව සහ ජීව ශක්තිය පෙන්නුම් කර ඇත.

මෙම කලාපයේ ප්‍රධාන නගර නවය ආශ්‍රිත ආනයන සහ අපනයන ප්‍රමාණය ද මෙම වසරේ මුල් මාස හතර තුළ, යුවාන් ට්‍රිලියන 3.4ක (ඇ.ඩො. බිලියන 497.3ක් පමණ) එනම් 18.4%ක වාර්ෂික වැඩි වීමක් පෙන්නුම් කර ඇති අතර එය චීනයේ සමස්ත විදේශ වෙළඳ වර්ධනය සඳහා වන හතරෙන් එකක පමණ දායකත්වයකි.