යුරෝපා සංගමය ඇතැම් චීන ව්‍යවසායන් "අධි අවදානම් සැපයුම්කරුවන්" ලෙස ලැයිස්තුගත කිරීමට චීනයේ දැඩි විරෝධය

යුරෝපා සංගමය ඇතැම් චීන ව්‍යවසායන් “අධි අවදානම් සැපයුම්කරුවන්” ලෙස ලැයිස්තුගත කිරීමට චීනය දැඩි ලෙස විරුද්ධ බව චීන වාණිජ අමාත්‍යාංශ ප්‍රකාශිකා He Yongqian මහත්මිය පවසයි.

යුරෝපා සංගමය මෑතකදී සාමාජික රටවල් වෙත ලේඛනයක් නිකුත් කරමින් බලශක්තිය,ප්‍රවාහනය සහ තොරතුරු හා සන්නිවේදන තාක්ෂණ සේවා කළමනාකරණය ඇතුළු ප්‍රධාන කර්මාන්ත 18කින් ඊනියා “අධි අවදානම් සැපයුම්කරුවන්” බැහැර කරන ලෙස බලහත්කාර ඉල්ලීමක් කර තිබේ. අද (22) පැවති නිත්‍ය මාධ්‍ය හමුවේදී වාර්තාකරුවෙකු මේ සම්බන්ධයෙන් නැගූ ප්‍රශ්නයකට පිළිතුරු දෙමින් He Yongqian මහත්මිය ඒ බව පැවසුවාය.

චීනය මේ සම්බන්ධයෙන් බරපතල ලෙස කනස්සල්ලට පත්ව සිටින බව ඇය පැවසුවාය. චීන ව්‍යවසායන් දිගු කලක් යුරෝපයේ නීති සහ රෙගුලාසීන්ට අනුකූලව ක්‍රියාත්මක වී ඇති අතර, යුරෝපීය ජනතාවට උසස් තත්ත්වයේ නිෂ්පාදන සහ සේවා සපයමින් එහි විදුලි සංදේශ සහ ඩිජිටල් කර්මාන්ත සංවර්ධනය ඵලදායී ලෙස ප්‍රවර්ධනය කරයි. කෙසේ වෙතත්, කිසිදු සත්‍ය පදනමක් නොමැතිව,යුරෝපා සංගමය ඇතැම් චීන ව්‍යවසායන් “අධි අවදානම් සැපයුම්කරුවන්” ලෙස ලැයිස්තුගත කර ඇති අතර,5G ඉදිකිරීම් සඳහා ඔවුන්ගේ සහභාගිත්වය ද සීමා කර ඇත. චීන ව්‍යවසායන්ට එරෙහිව යුරෝපා සංගමය විසින් අනුගමනය කරන ලද වෙනස්කම් කිරීමේ ක්‍රියාවන්ට සහ ආර්ථික හා වෙළඳ ගැටළු දේශපාලනීකරණය කිරීමේ සහ ආරක්ෂාව අධික ලෙස අවධාරණය කිරීමේ වැරදි ක්‍රියාවන්ට චීනය දැඩි ලෙස විරුද්ධ බව He Yongqian මහත්මිය පැවසුවාය.