චීන විදේශ අමාත්‍යවරයා සහ කැනේඩියාවේ අගමැතිවරයා අතර හමුවක්

කැනේඩියාවේ අගමැති Mark Carney මහතා, චීන විදේශ අමාත්‍ය Wang Yi මහතා හමු‌ වේ. එම හමුව ඊයේ(29) ඔටාවාහිදී පැවැත්විණ.

කැනඩාව සහ චීනය අතර නව උපායමාර්ගික හවුල්කාරිත්වයක් ගොඩනැගීමට මෙම වසරේ මුල් කාලයේ චීනයේ නිල සංචාරයේදී තමා සහ චීන නායකයින් එක්ව තීරණය කළ බව Mark Carney අගමැතිවරයා එහිදී සිහිපත් කළේය. ඉන් පසු මාස හතර තුළ, කැනඩාව සහ චීනය අතර සියලු මට්ටම්වල හුවමාරු සහ විවිධ ක්ෂේත්‍රවල සහයෝගීතාව වේගවත්ව සංවර්ධනය කර ඇති අතර, එය ධනාත්මක ප්‍රතිඵල ලබා දී ඇත. ගෝලීය ආර්ථික සංවර්ධනයට සහ ලෝක සාමයට හා ස්ථාවරත්වයට දායක වීම සඳහා, චීනය සමග බහුපාර්ශ්විකත්වය ඒකාබද්ධව ප්‍රවර්ධනය කිරීමට සහ ක්‍රියාත්මක කිරීමට කැනඩාව කැමැත්තෙන් සිටින බව ද ඔහු සඳහන් කර ඇත.

ද්විපාර්ශ්වික සබඳතාව සුරක්ෂිත, ස්ථාවර සහ තිරසර සංවර්ධනය වෙත ප්‍රවර්ධනය කිරීම සඳහා චීනය කැනඩාව සමග කටයුතු කිරීමට කැමැත්තෙන් සිටින බව චීන විදේශ අමාත්‍ය Wang Yi මහතා එම හමුවේදී පැවසීය. දෙපාර්ශ්වය බහුපාර්ශ්විකත්වයෙහි එල්බ සිටිමින්, නිදහස් වෙළඳාමට සහයෝගය දැක්විය යුතු බවත්, එමගින් දෙරටේ ජනතාවට පමණක් නොව, කැළඹිලි සහිත ලෝකයකට චීනයෙන් සහ කැනඩාවෙන් ස්ථාවරත්වය එක් කරනු ඇති බවත් ඔහු වැඩිදුරටත් ප්‍රකාශ කර ඇත.

එදිනම, Wang Yi මහතා කැනේඩියාවේ විදේශ අමාත්‍ය Anita Anand මහත්මිය හමු විය. චීන සහ කැනේඩියාවේ විදේශ අමාත්‍යවරුන් අතර උපායමාර්ගික සංවාද යාන්ත්‍රණයක් ස්ථාපිත කිරීමට, විදේශ අමාත්‍යාංශයේ දේශපාලන හා ආරක්ෂක උපදේශනය සහ ඉහළ මට්ටමේ ජාතික ආරක්ෂාව සහ නීතියේ ආධිපත්‍යය පිළිබඳ සංවාද නැවත ආරම්භ කිරීමට දෙපාර්ශ්වය එකඟ වී ඇත.