චීනය සාමය සඳහා වූ බලාපොරොත්තුව අත් නොහරියි-චීන විදේශ ඇමති

චීන කොමියුනිස්ට් පක්ෂයේ මධ්‍යම කාරක සභාවේ දේශපාලන කාර්යාංශයේ සාමාජික, විදේශ අමාත්‍ය වං යී මහතා සෞදි විදේශ අමාත්‍ය Faisal bin Farhan Al Saud මහතා සමග දුරකථන සංවාදයක නිරත විය.

එහිදී මැද පෙරදිග නවතම තත්ත්වය පිළිබඳව දැනුවත් කළ සෞදි අරාබි විදේශ අමාත්‍යවරයා සඳහන් කළේ, තම රට සංයමයෙන් සිටින නමුත් ආත්මාරක්ෂාව සඳහා අයිතිය රඳවා ගත් බවය. කලාපීය ආරක්ෂාව සහ ස්ථාවරත්වය සඳහා චීනය ඉටු කරන ධනාත්මක කාර්යභාරය සෞදි අරාබිය අගය කරන බව ද ඔහු කීය.

ආතතීන් තවදුරටත් උත්සන්න වීම වැළැක්වීම සඳහා හමුදා මෙහෙයුම් නතර කර, හැකි ඉක්මනින් සංවාදයට සහ සාකච්ඡාවලට නැවත පැමිණෙන ලෙස චීනය විවිධ පාර්ශ්වයන්ගෙන් දැඩි ලෙස ඉල්ලා සිටින බව වං යී මහතා එහිදී සඳහන් කළේය.

අනතුරුව චීන විදේශ අමාත්‍යවරයා එක්සත් අරාබි එමීර් රාජ්‍යයේ නියෝජ්‍ය අගමැති, විදේශ අමාත්‍ය Sheikh Abdullah Bin Zayed මහතා සමග ද දුරකථන සාකච්ඡාවක් පැවැත්වීය.

එක්සත් අරාබි එමීර් රාජ්‍යය යුද්ධයේ පාර්ශ්වකරුවෙකු නොවන අතර ගැටුමට සහභාගී නොවූ බවත් තම රට නීති විරෝධී ප්‍රහාරවලට ලක් නොවිය යුතු බවත් Sheikh Abdullah Bin Zayed මහතා මෙහිදී ප්‍රකාශ කළේය.

යුද්ධයට පෙර සිටම සාමය ප්‍රවර්ධනය කිරීමට එක්සත් අරාබි එමීර් රාජ්‍යය දැරූ උත්සාහයන් චීනය අගයන බව චීන විදේශ අමාත්‍යවරයා පැවසීය. චීනය සාමය සඳහා වූ බලාපොරොත්තුව අත් නොහරින අතර මේ සඳහා අඛණ්ඩව ඵලදායී කාර්යභාරයක් ඉටු කිරීමට සූදානම්ය. මැද පෙරදිග ප්‍රදේශයට නැවත සාමය සහ ස්ථාවරත්වය උදා කරලීම ප්‍රවර්ධනය කිරීම සඳහා චීනය මැද පෙරදිග ගැටලු පිළිබඳ විශේෂ නියෝජිතයෙකු කලාපයට යවනු ඇතැයි ද වං යී මහතා ප්‍රකාශ කළේය.